Në konferencën e fundvitit, kryeministri Rama u la afat datën 20 janar kompanive që deklarojnë paga fiktive për të vetrregulluar deklarimet.
Në të kundër, tha kryeministri, do të nisin hetimet për evazion, i cili dënohet me burg.
“Kemi kaluar një ngjarje shumë të shëmtuar dhe shqetësuese. Pjesa kriminale i takon prokurorisë që po heton në mënyrë intensive. Besoj dhe kam arsye që do të kemi rezultate. Kush e ka bërë do të përballet me ligjin. Në këndvështrimin e afatmesëm kjo ngjarje do të quhet edhe ‘jo çdo e keqe vjen vetëm për keq’. Ekspozimi i të dhënave që lidhen me pagat është i papranueshëm, por sot ka një pasqyrë domethënëse në sytë e të gjithë shqiptarëve. Duke filluar nga mediat, nuk është një situatë kjo e ngjashme që ka qenë më parë, por është një situatë e papranueshme. Askush nuk na thotë dot që po sulmojmë mediat duke kërkuar nga të gjitha kompanitë që japin paga fiktive të rregullojnë deklarimet. Drejtoria e tatimeve do të nisë një letër për të gjithë tatimpaguesit me deklarime shqetësuese që rezultojnë me deklarime fiktive, duke kërkuar që të vetrregullohen me vetdeklatrimet e reja deri më 20 janar. Në rast të kundër do të ketë hetim të thelluar për evazion, i cili dënohet me burg”, u shpreh Rama.
