Ish-kryeministri Sali Berisha deklaroi se Partia Demokratike është ngritur mbi nivelin e Prillit 2021 – kur kjo forcë politike mori mbi 620 000 vota në zgjedhjet parlamentare.
Berisha ishte këtë të Mërkurë në Vlorë, ku u mbajt një aktivitet me rastin e 31-vjetorit të themelimit të degës së Partisë Demokratike në qytetin bregdetar. Ish-kryeministri hodhi kritika ndaj Bashës, për të cilën tha se tradhtoi demokratët e elektoratin, duke mos protestuar për vjedhjen e votave më 25 Prill. Berisha tha demokratët u gjetën “mjerisht e sistematikisht të tradhtuar nga një njeri që do hyjë në historinë politike të Shqipërisë si politikani më i papërgjegjshëm i forcës së tij politike dhe ndaj vendit”.
“Por, sot kemi rast të ndihemi krenarë, sepse nëse hedhim një sy në hartën politikë të Europës ish-komuniste, forcat politike si e jona janë arkivuar në histori përveç në Hungari – Fidesit. Mirëpo ne mbijetuam. Në rast se Fidesi pati fat të ketë një lider të vendosur që e çoi këto vite nga fitorja në fitore, PD pati fatin e keq të ketë në krye një njeri që e çoi nga disfata në disfatë. E megjithë këtë ecuri, ne në 25 prill ishim së bashku 620 mijë shqiptarë. Pra një forcë politike madhore, por pa një kokë. Nga këta 620 mijë vetëm, 19 përqind i besonin kryetarit të PD-së, 81 përqind, më vizionarët, s’kishin besim te ai njeri se ai s’meritore besimin tuaj, s’meritonte besimin e demokratëve dhe më 26, 27 prill, në vend që ftonte demokratët të mbushnin sheshet për të mos pranuar një palë zgjedhje të cilat u zhvilluan me sistemin më antidemokratik të patronazhistëve, u zhvilluan me blerje mavsie të votës duke disbursuar në dy muaj e fushatës mbi 130 mln euro për zonat e dëmtuara nga tërmeti, duke disbursuar mbi 60 mln euro për zhavorr dhe asfalte elektorale gjatë fushatës në bashkitë socialiste. Njeriu që e shpalli masakrën elektorale do shndërrohej në tradhtarin më absolut. Në vend të merrej me manipulimin e votës ë shqiptarëve u mor me manipulimin e votës së tij për të siguruar karriget”, tha Berisha.
“Por ne jemi në këmbë dhe arritëm ta mbyllim vitin 2021 si një vit shprese për shqiptaret se e ngritëm PD në një force politike që i besojnë shqiptarët. Dhe kjo jo se e them unë por faktohet nga të gjitha studimet që treguan se nga një rënie katastrofale, sot PD është ngritur mbi nivelin e prillit 2021, sot PD është bërë shembull për shqiptarët se i tregoi shqiptarëve se ne që sollën votën e lirë kemi një vlerë të shenjtë te ajo votë”, shtoi.
Berisha foli dhe për “Foltoret” e Kuvendin e 11 Dhjetorit, që e cilësoi “mrekullia e pluralizmit shqiptar”. Më tej, përmendi referendumin për shkarkimin e Bashës si kryetar i PD-së më 18 Dhjetor, duke u shprehur se mahniti shqiptarët si dhe konservatorët e demokratët në mbarë botën me votën e lirë.
Berisha u shpreh se “e mbyllim vitin me një opozitë të vërtetë”.
