Kryetarja e Këshillit të Lartë Gjyqësor, Naureda Llagami, ka ngritur alarmin se në të gjitha gjykatat po rritet ngarkesa e gjyqtarëve për shkak të largimeve nga Vetting-u.
Llagami tha gjatë një aktiviteti, se për një gjyqtar sot mesatarja është 640 çështje, por në Administrativen e Apelit dhe tek Apelit Tiranë mesatarja shkon deri në 3 mijë. Ajo shtoi se kambana ka kohë që po bie dhe se ky shqetësim ka kohë që është ngritur.
“Nëse i referohemi ngarkesës së gjyqtarëve për gjykatat në këtë vit mund të themi se kemi shkuar në një mesatare në 640 çështje për gjyqtar, pa përfshirë këtu dhe ngarkesën në Gjykatën e Lartë. Gjithashtu kemi dhe gjyqtar me mbi 3 mijë çështje, siç është Gjykata Administrative e Apelit dhe Gjykata e Apelit Tiranë ku kemi shkuar mbi 2500 çështje për gjyqtar. Kostoja më e madhe është morale, e besimit që kërkojnë qytetarët tek Reforma në Drejtësi. Kambana ka kohë që po bie. Për më shumë se një vit e kam ngritur këtë shqetësim. Diskutimi nuk është të fitosh apo të kesh të drejtë. Madje dhe harta e propozuar nuk do të jetë e mjaftueshme për të stabilizuar humbjet që kemi në sistem”, tha Llagami.
