Nga BoldNews.al
Të dhënat mbi pagën e qindra mijëra qytetarëve janë të lidhura me të dhënat që qarkullonin në duart e Patronazhistëve të Partisë Socialiste para zgjedhjeve të 25 Prillit 2021.
“Boldnews.al” kreu verifikimet në “Listën e dytë” të pagave, të rrjedhur së fundmi në telefonat e qytetarëve e në media, ku u konstatua se të dhënat e “Rrogave” përputhen me të dhënat e “Patronazhistëve”.
Për të sqaruar më thjesht.
Këtë të Enjte, në shumë rrjete sociale mbërriti dorë pas dore një listë e dytë pagash, në formatin kompjuterik “Excel”.
Ky dokument përbëhej nga dy fletë “sheet”. Në të parin ishin pagat e qindra mijëra qytetarëve, ndërsa në të dytin ishin të dhënat personale, përfshirë numrin ID dhe telefonat e shumë e shumë njerëzve.
Një anëtar i stafit të redaksisë kreu një verifikim të thjeshtë mbi këto të dhëna.
Muaj më parë, gazetari i “Boldnews.al”, i cili posedonte dy numra telefoni, përdori njërin prej tyre për të regjistruar në “E-Albania” një familjar të tij të afërt. Ky familjar ka një numër personal telefoni, por për lehtësi u përdor një prej numrave të gazetarit të “Bold”.
Në “Listën e Dytë të Pagave”, të publikuar së fundmi, u konstatua se krah emrit të familjarit gjendej numri i telefonit të gazetarit, i cili e ka përdorur këtë të fundit vetëm në një rast-në regjistrimin e familjarit të tij në sistemin “E-Albania”.
Ky verifikim i thjeshtë krijon dyshime të forta se “Lista e Pagave”, e rrjedhur në mënyrë ende të pazbuluar nga institucionet shtetërore, është e njëjtë me atë që kishin në dorë “Patronazhistët” e Partisë Socialiste.
Kryeministri Edi Rama u shfaq mesditën e së Enjtes në një konferencë të posaçme për median, ku kërkoi ndjesë për rrjedhjen e informacionit konfidencial të qindra mijëra qytetarëve dhe premtoi se do të kryhet një hetim i plotë e i thelluar për autorët e kësaj ngjarjeje kriminale.
Rama, gjithashtu, nuk harroi që të vinte gishtin si autor të mundshëm tek kundërshtarët e tij politikë e sidomos tek ish-kryeministri Sali Berisha.
Megjithatë, verifikimet e thjeshtë mbi bazën e rrjedhur të të dhënave krijojnë të gjithë dyshimet se “autorët e krimit” gjenden brenda stafit të qeverisë së tij.
Për më tepër, këto të dhëna duket se kanë pasur edhe një orientim shtetëror, pasi informacioni mbi “Pagat” dhe të dhënat personale në duart e “Patronazhistëve” kanë shumë të përbashkëta.
Prokuroria njoftoi se ka nisur një hetim penal për nxjerrjen e të dhënave konfidenciale. Megjithatë, një procedim penal i nisur më herët për të dhënat e “Patronazhistëve” nga Struktura e Posaçme Kundër Korrupsionit rezultoi një dështim më vete.
