Rrjedhja e të dhënave sensitive të rreth 700 mijë qytetarëve vijon të dalë me databaza të reja. Kur janë shpërndarë tre dokumente që përmbajnë të dhëna personale si pagat, numrat identifikues të çdo qytetari, apo dhe targat së fundmi, përgjithësisht këshilli I ministrave kalon në atë që quhet krizë kibernetike por diçka e tillë nuk ka ndodhur.
Në sistemin shqiptar, pjesën më të madhe të administrimit të sistemeve të IT të institucioneve qeveritare, ose ato që njihen si kritike, i ka në përgjegjësi Agjencia Kombëtare e Shoqërisë së Informacionit ose AKSHI. Vetë institucionet kanë në zotërim aplikacionet siç është e-tax, që ka drejtoria e tatimeve ku regjistrohen të dhënat e pagamarrësve.
Gjendja civile ka aplikacionin e regjistrit me numrat identifikues të qytetarëve, ndërsa ajo e targave aplikacionin përkatës. Të dhënat e këtyre institucioneve janë ekspozuar çka vërteton se masat e sigurisë kibernetike në serverat e këtyre institucioneve nuk funksionojnë.
Në nivelin qeveritar reagimi është inekzistent, kjo pasi ngrirja e sistemeve do mund ti jepte mundësinë autoritetit kombëtar për certifikimin elektronik dhe sigurinë kibernetike që të bënte hetimin e nevojshëm. I njohur ndryshe dhe si grupi për emergjencat kompjuterike që ndodhet, duhet të kishte marrë në analizë paraprake situatën dhe publiku duhet të njoftohej në mënyrë periodike mbi ecurinë e ngjarjes, por diçka e tillë nuk po ndodh.
A2 CNN kontaktoi me drejtoreshën e këtij institucioni Vilma Tomço, e cila tha se auditimet e sigurisë kibernetike bëhen çdo vit.
“AKCESK, në zbatim të ligjit për Sigurinë Kibernetike, përcakton masat e sigurisë kibernetike si dhe bën auditim periodik për zbatimin e këtyre masave nga Operatorët e Infrastrukturave Kritike dhe të Rëndësishme, të cilat janë të miratuara me Vendim të Këshillit të Ministrave. Në bazë të konstatimeve të evidentuara nga këto audite lihen rekomandimet përkatëse si dhe ndiqet nga ekipi i AKCESK mbi zbatimin e këtyre rekomandimeve. Bazuar ne Ligjin 2.2017, Neni 19, Nr 2: Gjendja e krizës kibernetike shpallet me vendim të Këshillit të Ministrave, me propozimin e ministrit përgjegjës, të shoqëruar me relacionin përkatës. Urdhri për shpalljen e gjendjes së krizës kibernetike njoftohet në media”
Mesa duket rekomandimet për institucionet dhe serverat që ata kontrollojnë nuk janë zbatuar asnjëherë ndërsa në vend vijojnë të dalin të dhëna sensitive të qytetarëve.
