Baton Haxhiu ka reaguar pas publikimit në aplikacionet e komunikimit i disa të dhënave personale, mes tyre edhe paga mujore, e mbi 600 mijë qytetarëve.
Sipas listës së pagave për muajin Janar, Baton Haxhiu ka marrë rreth 18 milionë lekë (të vjetra) pagë bruto si “Drejtor i marketingut” nga Spitali Amerikan.
Në reagimin lidhur me publikimin e të dhënave, Haxhiu tha kjo është e pahijshme, shtoi se ai punon nga 15 orë në ditë dhe meriton “më shumë se 100 mijë euro”.
“Është e pahijshme që ta ekspozosh njeriun që punon nga 15 orë në ditë dhe t’i shqetësosh të tjerët me rrogën time. T’i ekspozosh dukujt që e ka 10 mijë Euro rrogën kjo i bie që askush nuk e shikon punën tënde që ke 3 emisione në atë televizion. Rroga ime hyn në pjesën e sekretit tim. Nuk di çfarë duhet t’i ekspozohet njeriut më shumë se aq. Jam lakuriq për arsye se ekspozimi i punës time bëhet për 10% të shikuesve. Këto janë gjëra që janë të pahijshme. Dhe ne meritojmë më shumë se aq se të gjitha këto gjëra që bëjmë ne në botë kushtojnë më shumë se 100 mijë Euro”, u shpreh.
“Unë nuk di kë të padis. Edi Rama bëri një kërkesë falje publike por ende s’ma ka gjetur fajtorin. Ajo që unë kërkoj është që kush është njeriu që moralisht duhet të ikë nga vendi i punës”, tha Baton Haxhiu.
Spitali Amerikan që sipas të dhënave të publikuara ka derdhur rreth 18 mln në Janar për Baton Haxhiun, në fakt është vënë shpesh në qendër të kritikave për shkak të miliardave të parave publike të përfituara parmës procedurës së koncesioneve, të dyshuara si korruptive.
Kujtojmë se koncesioni i shumëdebatuar i dializës i është dhënë kompanisë DiaVita, e zotëruar 15% nga Spitali Amerikan dhe 75% nga Evita-një kompani e vogël, e cila zotërohet tanimë në shumicë nga pronarë të panjohur nën “guackën” e kompanisë ARIMO B.V me seli gjithashtu në Holandë. Sipas Autoritetit të Konkurrencës, Spitali Amerikan është përfituesi më i madh i fondeve publike për shërbimin e dializës, si përmes kontratave direkte me Fondin e Sigurimit të Kujdesit Shëndetësor, ashtu edhe përmes kompanisë DiaVita.
Autoriteti i Konkurrencës konstatoi se ky koncesion, bashkë me Check-up-in, “kanë ndryshuar ndjeshëm kushtet e tregut, dhe kjo dikton nevojën e një rishikimi të nevojave reale të tij, si dhe termave të projekt-kontratës së koncesionit për ofrimin e shërbimeve diagnostikuese nga laboratorët mjeksorë”.
Për këtë shërbim ka pasur akuza e raportime të herëpashershme se pavarësisht miliardave të përfituara, kushtet e ofrimit të shërbimit janë të mjerueshme.
