Tirana e ka mbyllur në avantazh 1-0 pjesën e parë ndaj Partizanit. Momenti që vendosi fatet e 45 minutëshit të parë të lojës ishte ai i minutës së 28-të.
Pas një goditje nga këndi, Ngo gjuan dhe topi përplaset te Përgjoni e shkon në rrjetë. Një gol i çuditshëm por shumë I rëndësishëm për bardheblutë ndaj rivalit të kryeqytetit.
Tirana pati edhe mundësinë për të dyfishuar shifrat në minutën e 40-të. Xhixha u shfaq i vetëm para Teqjes, por fluturon topin mbi traversë.
Partizani ka mundësinë reale që të rrezikojë portën e Bekajt në minutën e 22-të pasi gjendet në një kundërsulm në situatën 4 kundër 2. Por topi nga e djathta është shumë i gjatë për Rrapajn dhe aksioni mbyllet me të kuqtë pa iu afruar zonës kundërshtare.
Ndërkohë për tu përmendur është fakti që paniku përfshiu për disa minuta sfidën. Gjatë momentit të festimit të golit të Tiranës, një tifoz pati rrahje të forta të zemrës dhe stafi mjekësor kërkoi ndihmën e ambulancës. Loja u ndal për disa minuta në mënyrë që të merrej një konfirmim për këtë ngjarje. Tifozi u shoqërua me ambulancë jashtë stadiumit.
