Komitetit Teknik i Ekspertëve për parandalimin e përhapjes së Covid ka vendosur të mos ndryshojë masat në fuqi për parandalimin e përhapjes së koronavirusit.
Mira Rakacolli, drejtuese e komitetit, njoftoi se përjashtim do të ketë natën e ndërrimit të viteve, kur do të hiqet orari policor.
“Analiza e indikatorëve epidemiologjikë sugjeron që niveli i masave që janë në fuqi është i përshtatshëm për ta kontrolluar këtë situatë. Për momentin do të mbeten në fuqi të njejtat masa që kemi edhe sot. Prania e variantit Omicron me vetinë e tij për t’u përhapur shumë herë më shpejt se sa paraardhësit e tij, bën të domosdoshëm respektimin e përgjegjshëm të këtyre masave. Ora policore do të vazhdojë të mbetet e njejtë deri në orën 23:00 me përjashtim të natës së ndërrimit të viteve”, tha Rakacolli.
“Ora policore ka lidhje me lejimin e lëvizshmërisë së njerëzve përgjatë gjithë asaj nate duke menduar që njerëzit do të duan të jenë së bashku në familjet, fëmijët të shkojnë të takojnë prindërit dhe mund ta kalojnë vitin e ri së bashku. Aktivitetet do të organizohen sipas standardeve të përcaktuara me kohë, të lejimit të grumbullimit të personave sipas kapaciteteve ku mund të grumbullohen njerëzit për të festuar së bashku”, shtoi.
Ajo kujtoi se nga 4 Janari hyjnë në fuqi masat e reja të kumtuara nga komiteti në fillim të muajin Dhjetor: Të gjithë punonjësve të administratës publike, qendrave tregtare dhe supermarketeve do tu kërkohet certifikata e vaksinimit, ose test PCR negativ çdo 5 ditë, për të hyrë në ambientet e punës.
Ndërkohë, mbeten në fuqi masat e marra më herët:
• Ora policore vijon me orën 23:00 – 06:00, përveç natës së ndërrimit të viteve.
• Punonjësit e administratës publike, të supermarketeve dhe qendrave tregtare do të paraqesin dokumentin e vaksinimit ose çertifikatat e shërimit me vlefshmëri deri në 6 muaj pas ditës së shërbimit, duke filluara nga data 4 janar 2022,
• Vijon që qytetarët që hyjnë në Republikën e Shqipërisë, nga të gjitha pikat kufitare apo ata që kalojnë tranzit, duhet të vijojnë të dorëzojnë një nga dokumentet e mëposhtme:
– Pasaportë vaksinimi, ku data e vaksinës së fundit të ketë të paktën dy javë e aplikuar nga data e hyrjes në kufi.
– Test PCR, të kryer brenda 72 orëve ose testin e shpejtë antigenic brenda 48 orëve të hyrjes në kufi.
– Provë të kalimit të infeksionit Sars-Cov-2 të vlefshme deri në 6 muaj pas shërimit.
– Qytetarët rezidentë të Republikës së Shqipërisë dhe që nuk kanë asnjë nga dokumentet e përmendura në pikën 1, duhet të vetë izolohen për një periudhë 10 ditore dhe të informojnë autoritetet shëndetësore për të kryer një test në fund të periudhës së izolimit.
• Vijon të mbetet në fuqi urdhri për përdorimin e maskave në ambiente të mbyllura, në qendra tregtare, supermarkete, dyqane etj, e në të gjithë ato vende ku nuk sigurohet distancimi fizik.
• Vijon të mbetet në fuqi urdhri për lejimin e grumbullimeve deri në 50 persona dhe të aktiviteteve kulturore, sportive etj deri në 30% të kapaciteteve të tyre me prezencë të spektatorëve.
Gjatë mbledhjes së komitetit, u njoftua prania e variantit “Omicron” në vend, si dhe u bë apel për respektimin e masave dhe vaksinim.
