Nesër luhet derbi i kryeqytetit, Partizani pret Tiranën në stadiumin “Air Albania”. Ditën e sotme, një skandal i madh ka tronditur vendin tonë teksa ka rrjedhur informacioni duke u publikuar të dhënat private të shqiptarëve dhe rrogat e tyre, që punojnë në publik dhe privat. E duke qenë se jemi në vigjilje të derbit, interesi është i madh për drejtuesit, stafin dhe lojtarët se si paguhen në këto dy klube që kanë bërë histori në vendin tonë.
Duhet theksuar se lista me 637 mijë shqiptarët i përket periudhës janar 2021. Pikërisht në atë kohë te Tirana ishte në krye të ekipit, Emanuel Egbo, ndërsa Orges Shehi u emërua në fund të muajit. Sakaq te Partizani situata është e njëjtë me trajnerin Ilir Daja që vijon të drejtojë të kuqtë.
Në informacionin e rrjedhur, rezulton se te Partizani më i paguari është drejtori Ols Rama me plot 8 milionë lekë të vjetër në muaj. Pas tij vjen presidenti Gaz Demi si administrator me 6 milionë lekë të vjetër, ndërsa trajneri Ilir Daja ka një pagë prej 1.2 milionësh të vjetër në muaj. Kapiteni Alban Hoxha paguhet me 900 mijë lekë.
Ndërkohë në kampin tjetër, të Tiranës ka qenë e pamundur të gjendet rroga e trajnerit Shehi. Megjithatë referuar shifrave të janarit, ish-trajneri Emanuel Egbo paguhej 1 milionë lekë të vjetër, aq sa edhe kapiteni Erion Hoxhallari. /Newsport.al
