Bie Napoli e ngrihet Milani. Dy skuadrat që u ndeshën në fundjavën e kaluar dhe ku fituan të kaltërit në ndeshjen direkte, luajtën sot në mbrëmje dhe surprizat nuk munguan.
Milani dha një përgjigje të fortë pas disfatës me Napolin duke fituar 4-2 në fushën e Empolit të surprizave që kishte javë që nuk humbiste.
Nedim Bajrami la gjurmë në këtë takim me një gol të shënuar por kuqezinjtë ishin shumë të fortë teksa fituan 4-2.
Kessie me dy gola dhe më pas Florenzi e Theo Hernandez zhvlerësuan golin e Bajramit ndërsa Pinamonti shënoi në 84’ për vendasit. Me këtë fitore Milani merr vendin e dytë me 42 pikë, 4 më pak se Interi.
Napoli ishte zhgënjimi i madh i mbrëmjes. Në “Maradona Stadium”, të kaltërit vinin pas fitores me Milanin por sot u ndalën nga Spezia me Manajn titullar të cilët arritën të merrnin 3 pikë të arta në këtë transfertë.
Ndeshja u vendos nga një autogol i pafat i Juan Jesus në 38 e me gjithë tentativat vendase sfida u mbyll 1-0 për miqtë. Manaj titullar dhe shumë aktiv në fushë teksa mori edhe një karton të verdhë.
