Në muajin prill të këtij viti, KShH reagoi publikisht duke evidentuar me shqetësim se asnjë subjekt zgjedhor nuk mund të mbajë të dhëna personale dhe sensitive të zgjedhësve, pa miratimin paraprak të tyre si dhe kërkoi nga organi i prokurorisë të hetojë me objektivitet çështjen e databazës me të dhënat e 900,000 zgjedhësve. Prokuroria e Posaçme ka shpallur moskompetencën, duke e përcjellë çështjen në prokurorinë e Tiranës ndërkohë që edhe pse kanë kaluar afro 8 muaj, nuk ka ende përgjegjës për këtë ngjarje.
Ditën e sotme qarkullon një tjetër databazë me të dhënat personale dhe të natyrës financiare të rreth 630,000 të punësuarve në sektorin shtetëror dhe privat. Përsëritja e precedentit të mëparshëm, tashmë në një format tjetër ka cenuar rëndë, në mënyrë të paprecedentë, për të dytën herë radhazi privatësinë e qytetarëve, brenda një harku të shkurtër kohor. Ndërkohë që Ministria e Financave ka deklaruar se ka bërë kallëzim penal në prokurori.
Sikurse Gjykata e Strasburgut ka njohur në jurisprudencën e saj, mbrojtja e të dhënave personale është e një rëndësie thelemore me qëllim që çdo person të gëzojë, pa u paragjykuar, të drejtën për respektimin e jetës private dhe familjare, banesës dhe korrespondencës, në përputhje me garancitë e ofruara nga neni 8 i Konventës Evropiane të të Drejtave të Njeriut.
