Gjykata e Posaçme e Apelit la të pandryshuara masat e sigurisë për zyrtarët dhe ish-zyrtarët e Ministrisë së Brendshme, të akuzuar për abuzim me tenderin prej 2,8 miliardë lekë të pajisjes së policisë me uniforma.
Sipas Apelit, 7 prej tyre do të vijojnë të qëndrojnë në qeli, përfshi edhe ish-drejtoresha e Agjencisë së Blerjeve të Përqendruara, Edlira Naqellarin, ndërsa një tjetër në arrest shtëpie.
Apeli rishqyrtoi masat e sigurisë ndaj të pandehurve, në zbatim të një vendimi të Gjykatës së Lartë.
Ndërkohë, në procesin ndaj tyre në Gjykatën e Posaçme, SPAK ka paraqitur konkluzionet përfundimtare duke kërkuar nga 12 muaj heqje lirie për secilin prej tyre.
Prokurorët e SPAK kanë zbardhur gjithë korrespondencën e mbajtur nga Policia e Shtetit dhe Agjencia e Blerjeve të Përqendruara, ku ka rezultuar që gjatë procedurës janë bërë ndryshime të specifikimeve teknike, çka është reflektuar në ndryshim të cilësisë dhe sasisë dhe kostos së prodhimit dhe shpërndarjes, por jo të fondit limit të parashikuar.
