Komisioneri për Zgjerim i BE, Oliver Varhelyi tha këtë të Martë se Ballkani i Hapur duhet të jetë një nismë gjithëpërfshirëse.
Varhelyi dha një mesazh me video, i transmetuar gjatë takimit Rama-Vuçic-Zaev në Tiranë, në kuadër të nismës “Ballkani i Hapur”.
Kryeministri Edi Rama kërkoi me ngulm një mbështetje nga Varhelyi për nismën, megjithatë, komisioneri e vuri theksin te bashkëpunimi mes të gjitha vendeve të rajonit.
“Ju nuk ndiqeni vetëm nga ne, por dhe nga ekranet e televizioneve. Ata duan të dinë që: a e mbështet BE Ballkanin e Hapur?! Ky do të ishte lajm i ditës”, tha Rama.
Oliver Varhelyi u shpreh se se ka qenë gjithmonë i prirur shumë pozitivisht ndaj këtij propozimi që u quajt në fillim mini-shengen, por shtoi se “e konsideroj këtë nismë si një pasardhëse apo një zëdhënëse, derisa të gjithë të jenë rreth tryezës”.
“Ju duhet të vazhdoni ta nxisni këtë nismë, sepse rajoni kërkon të jetë një i tërë sa i takon ekonomisë, shoqërisë. Rajoni kërkon të jetë bashkë, siç jemi ne në BE”, tha ai.
“Shpresoj që tre të tjerët të bashkohen shumë shpejt, sepse pa këtë plani nuk mund t’iu sjellë të gjitha përfitimet”, u shpreh më tej komisioneri.
