Ish-kryeministri Sali Berisha dënoi arrestimet dhe procedimet e policisë ndaj protestuesve të cilët akuzohen se dogjën flamuj të Serbisë në protestën e djeshme.
Në një deklaratë nga selia blu, Berisha tha se policia ushtroi dhunë ndaj të ndaluarve.
Ai i bëri apel policisë të mos dhunojë asnjë të drejtë njerëzore.
Konferencën për mediat, e nisi me një falënderim për pjesëmarrëset e protestës së djeshme, duke u shprehur se “mbushën bulevardin dëshmorët e kombit në një akt historik t protestës së dytë nga 1998 të partive politike për interesin e tyre kombëtar”.
“Prej tetë vitesh interesi kombëtar në Shqipëri mbeti jetim. Ai u nëpërkëmb dhe tradhtua në mënyrën më flagrante nga Edvin Kristaq Rama dhe me heshtje u tradhtua pothuajse njëlloj nga ish-kreu i opozitës që me program, me statut, duhet të mbronte këtë interes, Lulzim Bravës. PD e ringritur, e rithemeluar mbi vlerat konservatore u dëshmoi mbrëmë shqiptarëve dhe botës se interesi kombëtar në këtë vend ka një avokat të fuqishëm në opozitën shqiptare dhe PD. Theksoj se kjo s’është një protestë kundër bashkëpunimit rajonal por aleancës trilaterale të Beogradit me vasalët e tij Tiranën e Shkupin që sjell konfliktualitet, ushqen nacionalizmit dhe largon Ballkanin nga Europa, vendos hegjemonisë serbe në rajon dhe rajonin si zonët të influencës ruse. Aq më tepër kjo përmban një rrezik serioz po të kemi parasysh se dy vende vasale të Beogradit që janë anëtarësuar në këtë aleancë janë vende anëtarë të NATOS-s dhe e kanë bërë këtë akt pa marrë asnjë miratim nga NATO. Protesta pati një jehonë botërore”, tha Berisha.
“Dënoj disa akte brutale të narkopolicisë e cila ka arrestua mbrëmë njerëz të pafajshëm, i ka keqtrajtuar adoleshentët në furgonat e makinës, veçanërisht narkobanditë të komisariatit numër dy. Unë jam për të paralajmëruar narkopolicinë se revolucioni paqësor s’do tolerojë dhunimin e të drejtave të njeriut dhe keqtrajtimin çnjerëzor të pjesëmarrësve në protesta apo në lëvizje revolucionare”, shtoi.
“Mbrëmë deri në 1 të natës, në qelitë e komisariateve me urdhër të Edvin Kristaq Ramës, janë mbajtur adoleshentë 15-vjeçarë, por dhe burra të moshuar 84-vjeçarë. I përshëndes dhe falënderoj deputetët dhe të gjithë drejtuesit, anëtarët e komisionit të rithemelimit të PD-së, zotërinjtë Noka, Bylykbashi, Shehi, Këlliçi, Gjata e shumë të tjerë të cilët kanë ndjekur në çdo orë deri në 1 të natës situatën në komisariatet 1 dhe 2. Shtoj këtu se megjithë absurditetin e ndalimit pa asnjë motiv, komisariati numër 1 nuk i ka keqtrajtuar, gjë që e ka bërë nëm mënyre çnjerëzore narkopolicë, narkobanditë të komisariatit 2. Jemi lëvizje paqësore, paralajmërimi përfundimtar është mos të dhunojnë asnjë të drejtë njerëzore”, u shpreh ai.
