Policia e Shtetit pritet të angazhojë disa qindra trupa policore lidhur me protestën e thirrur nga ish-Kryeministri Sali Berisha, pasditen e sotme në Tiranë.
Protesta do të nisë në orën 16:00, ndërsa protestuesit janë thirrur për tu grumbulluar te selia e PD dhe më pas do të marshojnë drejt Kryeministrisë.
Godinat qeveritare do të mbrohen nga efektivë të Gardës së Republikës, ndërkohë që trupa speciale të policisë do të jenë të dislokuara në zonën pranë Kryeministrisë, të gatshëm për të ndërhyrë, nëse do të ketë precipitim të situatës.
Protesta e thirrur nga Berisha ka lidhje me aferën e inceneratorëve, e cila konsiderohet si vjedhja më e madhe që i është bërv shqiptarëve në 30 vjet, si dhe “Open Balkan” që konsiderohet projekti më anti-shqiptar.
Protesta përkon me vizitën e Presidentit serb Aleksandar Vuçiç dhe kryeministrit në detyrë të Maqedonisë së Veriut, Zoran Zaev.
Kjo ka bërë që në terren të angazhohen edhe agjentë të agjensive ligjzbatuese, edhe pse nuk ka të dhëna që protesta mund të precipitojë.
Në total pritet të angazhohen mbi 1200 trupa policore, përfshi edhe ato të reparteve speciale, FNSH dhe RENEA, ndërsa para godinës së Kryeministrisë do të vendosen trupa të komisariateve të Tiranës.
Kjo është protesta e parë që ish-Krzeministri Sali Berisha thërret, që nga momenti kur dorëzoi postin e Kreut të PD-së në 2013, pasi më parë protestat i organizonte Lulzim Basha.
