Marash Logu, këshilltar pranë Grupit Parlamentar të PD, ka reaguar lidhur me incidentin në studion e emisionit “Top Talk”, ku ai u quajt nga drejtuesi i emisionit “kamikaz”. Logu u largua nga studio, ndërsa në një reagim të tij në rrjetet sociale, jep versionin e tij lidhur me atë ç’ka ndodhi. Logu paralajmëron se do t’i drejtohet gjykatës lidhur me fyerjen që i është bërë nga drejtuesi i emisionit, duke e cilësuar këtë një standard të ri në politikë dhe në debatin publik.
Në fakt paditë për fyerje dhe shpifje nuk është se janë ndodnjë standard i ri, pasi ka me dhjetra gazetarë që janë përballur në dyert e gjykatave, të akuzuar për shpifje apo fyerje.
“Unë nuk mund të injoroja arrestimin e ish-ministrit të qeverisë Rama 1 për aferën korruptive të incineratorëve. Prandaj, zgjodha të them mendimin tim shkurtimisht mbi këtë çështje, me lejen e gazetarit, dhe më pas të kthehesha te tema për të cilën isha ftuar. Kjo, siç duket, prodhoi shqetësim te gazetari Dyrnjaja, i cili jo vetëm më ndërpreu, por në pamundësi për të ruajtur etikën, kaloi në ofendime dhe etiketime personale.
Megjithëse, fjala e përdorur ishte e rëndë, edukata ime nuk ma lejoi t’i përgjigjesha me të njëjtën gjuhë, por i bëra thirrje disa herë të kërkonte falje për etiketimin “kamikaz”. Ai jo vetëm refuzoi ta bënte këtë, por insistoi që mikrofoni im të fikej dhe më pas mbylli emisionin”, shprehet Logu.
Ai në vijim thekson se i kishte kursyer gazetarit Dyrnjaja në studio për shkak të respektit për teleshikuesit, do ta marrë në gjykatë.
“Prandaj, të hënën do të depozitoj një padi penale për fyerje, të kryer botërisht. Si profesionist i ligjit, si politikan i ri, nuk do t’i lejoj asnjëherë vetes që qytetarët të përballen me mungesë qytetarie nga ana ime.
Por, po ashtu ndaj çdo fyerje, ndaj çdo shpifje do të zgjedh rrugën ligjore, gjykatën. Ne, të rinjtë, duhet të sjellim një standard të ri në politikë dhe debatin publik”, tha ai.
