Partizani duket se nuk është në gjendjen më të mirë fizike para ndeshjes të së dielës në orën 16:45, ndaj Kukësit në “Loro Boriçi”.
Zëvendëskapiteni Egzon Belica nuk ishte i pranishëm as në stërvitjen e djeshme. Lideri i mbrojtjes po kalon një gjendje gripale dhe po trajtohet me medikamente.
Situata shëndetësore e tij vazhdon ta pengojë për të zbritur në fushë dhe për të përgatitur duelin e radhës. Në këto kushte zvogëlohet akoma më shumë mundësia që mbrojtësi të jetë në fushë ndaj Kukësit, pasi kanë mbetur vetëm dy seanca trajnimi përpara ditës së ndeshjes dhe nuk dihet kur ai rikthehet.
Sakaq, siç u njoftua nga klubi, Junior u kthye dje në stërvitje, por u stërvit i veçuar. Sulmuesi nisi vrapimin rreth fushës me gjithë ekipin, por dukej qartë se e kishte të vështirë të ndiqte ritmin e shokëve dhe mbeti mbrapa.
Më pas, pjesa tjetër e skuadrës vazhdoi normalisht stërvitjen, ndërsa Zhunior vrapoi rreth fushës, ku ra në sy ritmi mjaft i ulët i vrapimit të sulmuesit, duke lënë të kuptohet se kontraktimi muskulor nuk ka kaluar ende dhe do të dojë ende kohë. Gjithsesi, lajm i mirë është rikthimi i tij në stërvitje.
Një tjetër e veçantë në stërvitjen e Partizanit ishte edhe fakti që Sembene u stërvit i veçuar. Mbrojtësi i ardhur në merkaton e verës, i cili është pëlqyer shumë nga Daja dhe ka fituar vendin e titullarit, mori pjesë me grupin vetëm në fillim të stërvitjes dhe më pas, bashkë me Zhuniorin u impenjua vetëm në vrapim rreth fushës.
Nga ana tjetër, Maget, një tjetër lojtar i talentuar i të kuqve, ishte në kompleks, por nuk u stërvit me grupin, madje nuk ishte i veshur as më tutën e trajnimit.
