Lulzim Basha akuzoi këtë të Enjte ish-kryeministrin Sali Berisha se ka marrë me kërcënime delegatë në Kuvendin e 11 Dhjetorit, që ai e quajti “tubim”.
Ai tha se Berisha “vepron me mendësinë bolshevike – kush s’është me mua është kundër meje.”
Në emisionin “Open”, Basha shtoi se ka mesazhe të delegatëve që kanë qenë prezent në “Air Albania” më 11 Dhjetor. Sipas tij, një pjesë e delegatëve janë kërcënuar për të qenë aty.
“Nuk kanë votuar. Kanë qenë njerëz të cilët kanë qenë detyruar me mënyrat më të ulëta. Të kam futur në punë, ma ke detyrim të vish”, tha Basha.
Analisti: Po provat?
Lulzim Basha: “Po nuk je ti juria dhe unë nuk e dua këtë gjyq. Unë dua një gjyq tjetër që ti dhe ata që sillen si ti por ua mohojnë shqiptarëve, dua gjyqin e Edi Ramës për inceneratorët, dua rrëzimin e këtij regjimi. Po, do vijnë në Kuvend sepse e dinë që me 18 dhjetor Partia Demokratike ka Kuvend ndërsa aty një pjesë prej tyre, nëse do t’i lexoj thonë zemërthyer që na kanë detyruar, na kanë kujtuar se si na kanë futur në punë. Na kanë kujtuar këtë dhe atë, na kanë marrë me dhjetëra herë në telefon dhe jemi të detyruar të shkojmë aty, por kemi firmosur me 18 dhe do të vijmë me 18. Kjo është e vërteta dhe këtë e dinë shumë prej atyre demokratëve që janë aty dhe e dinë të gjithë. Prandaj po ju them ejani me 18 dhe shikoni Kuvend demokratësh”.
