Drejtuesit e degës së PD Shkodër kanë kyçur me dry selinë blu në këtë qytet.
Ndërkohë anëtari i Komisionit të Rithemelimit të PD, Çlirim Gjata në një intervistë për Ora News është shprehur se ky veprim është i turpshëm, ndërsa ka shtuar se ata kanë zbatuar urdhrin që ka ardhur nga lart duke lënë të nënkuptohet se fjala është për Lulzim Bashën.
Ai shprehet ndër të tjera se zyrat janë të demokratëve, dhe vetëm këto të fundit e dinë se si të sillen me ambientet e tyre.
“Na akuzuan se kishim mbyllur demokratët në kasafortë kur çuam listat për thirrjen e Kuvendit. Tani mbyllen me zinxhirë dyert e degëve të PD, sikur janë qeli burgjesh dhe jo degët e partisë që përmbysi komunizmin. Së pari do ju bëja thirrje miqve të mi që drejtojnë Partinë demokratike të Shkodrës, pasi këto veprime nuk shkojnë.
Po ata po zbatojnë një urdhër absurd, por mirë do ishte që ky urdhër të mos dëgjohej. Kjo vjen nga ish-drejtuesit e PD të cilët kanë humbur jo vetëm qetësinë por edhe ekuilibrin mendor. Zyrat janë të demokratëve dhe demokratët e dinë vetë si të sillen me ambientet e tyre. Ne nuk veprojmë si Basha që ka mbushur listat duke përjashtuar demokratë që guxojnë të marrin pjesë në Kuvend dhe që firmosin për shkarkimin e tij. Nuk i ndalon dot demokratët që të arrijnë qëllimin e tyre.
Ndërkohë në lidhje me statutin e 11 dhjetorit që është çuar në Gjykatë për t’u shqyrtuar, Gjata tha se nëse kjo e fundit nuk bën regjistrimin e statutit të ri të miratuar në Kuvendin Kombëtar, ka ndërhyrje politike.
“Statuti jonë i ri në momentin e miratimit të shtunën më 11 dhjetor, momentin që është miratuar ka hyrë në fuqi, pavarësisht se nuk është dorëzuar në Gjykatë. Gjykata duhet të regjistrojë statutin tonë, i korrikut ka rënë. Gjykata thjesht bën depozitimin. Nëse Gjykata nuk bën regjistrimin e statutit të datës 11 domethënë që ka një ndërhyrje tepër të fuqishme politike. Sepse nuk ka asnjë arsye dhe as shkak ligjor që Gjykata të mos e regjistrojë”.
Agron Zhugri, do të jetë gjyqtari që do të shqyrtojë kërkesën nga Komisioni i Përkohshëm i Rithemelimit të PD për ndryshimet statutore të miratuara në Kuvendin kombëtar të 11 dhjetorit të thirrur në “Air Albania”.
Një nga ndryshimet kryesore që u miratuan në statutin e ri është dhe neni që kryetari i partisë lë mandatin menjëherë nëse humb zgjedhjet parlamentare dhe votëbesohet nëse humb zgjedhjet vendore.
