Policia e Riminit ka arrestuar sot pesë shqiptarë, të akuzuar për trafik droge në Romagna dhe pjesë të tjera të Italisë që nga tetori i vitit të kaluar.
Shqiptarët janë të moshave 21, 29, 31, 30 e 54 vjeç. 29-vjeçari është kreu i grupit që ka trafikuar 275 kile hashash e marijuanë, të sekuestruara në dhjetor 2020, e 115 kile hashash sekuestruar në Bresso në tetorin e mëparshëm një shqiptari 26-vjeçar, raportuan mediat lokale.
Kreu i grupit ka qenë organizator edhe për trafikimin në Itali të një sasie të madhe hashashi nga Spanja.
Policia ka sekuestruar një makinë, ka ushtruar kontroll në banesën e një familjari të njërit prej të arrestuarve dhe, në bashkëpunim me policinë e Barit, ka kontrolluar edhe një firmë fruta-perime në Bari.
Sipas hetimeve, droga magazinohej në disa vende në Puglia, mes tyre edhe selia e firmës së kontrolluar, prej nga transportohej në Rimini. Më 3 mars, policia arrestoi një çift shqiptarësh banues në Bari, në garazhin e të cilëve u gjetën 40 kile hashash.
