“Vendimet nul të anëtarit të PD Lulzim Basha nuk mund të sjellin asnjë pasojë”, u shpreh kreu i PD-së Vlorë, Genc Deromenaj, duke reaguar ndaj deklaratave të Bashës, se do të shkarkojë drejtuesit e degëve në rrethe, pjesë e Kuvendit të 11 Dhjetorit.
Deromenaj nuk e cilësoi si ndasi, pro Berishës apo kundër Bashës, por një pozicionim pro demokratëve.
I pyetur se çfarë do të ndodhë në 18 dhjetor, Deromenaj tha se në datë 18 dhjetor Kuvendi i demokratëve të 11 Dhjetorit ka thirrur një referendum për një nga pikat e votuara maksimalisht në 11 dhjetor që ka të bëjë me shkarkimin e zotit Basha dhe kjo do të ndodhë në të gjithë vendin.
A do njihet apo jo ky vendim edhe nga gjykata, Deromenaj ka theksuar se nuk ka gjykatë apo institucion që nuk njeh vullnetin e lirë të të gjithë demokratëve.
Ai ka folur edhe mbi situatën në PD, që aktualisht nuk është e mirë, por 11 Dhjetori dha shpresë dhe besim jo vetëm tek demokratët, por te të gjithë shqiptarët.
