Eintracht Frankfurt ka marrë një fitore të vuajtur për llogari të javës së 16-të në Bundesliga, teksa ka mposhtur me rezultatin 2-3 në transfertë Borussia Monchengladbach. Në fakt, takimi nisi më mirë për vendasit që zhbllokuan shumë shpejt shifrat e sfidës, që në minutën e gjashtë me anë të Neuhaus.
Ndërkohë, kur mendohej se pjesa e parë do të mbyllej me avantazhin e vendasve, Frankfurt gjen golin e barazimit në minutën e 45 më anë të Borre. Në fraksionin e dytë, ishin sërish miqtë që e vazhduan aty ku e mbyllën pjesën e parë dhe gjetën golin e përmbysjes me anë të Lindstrom në minutën e 50.
Megjithatë, Gladbach gjeti forcën për të reaguar dhe Bensebaini vetëm katër minuta më pas riktheu ekuilibrat. Por, ndoshta të “hutuar” nga goli, Gladbach harroi mbrojtjen dhe në aksionin pasardhës pësoi goli e tretë nga Kamada.
Pas këtij momenti, miqtë u treguan më të përqëndruar në fushë dhe ruajtën fitoren edhe pse 20-minuta i luajtën me një lojtar më pak pas largimit me karton të kuq të Tuta, i cili koleksionoi të verdhën e dytë. Pas këtij trepikëshi, Frankfurt ngjitet në vendin e shtatë të renditjes me 24 pikë, ndërsa Gladbach mbetet në vendin e 13 me 18 pikë.
