Vllaznia është skuadra që po kalon një moment të mirë në kampionat teksa në 5 ndeshjet e fundit ka arritur të marrë 4 fitore dhe 1 barazim.
Rezultatet e marra në javët e fundit kanë kthyer entuziazmin te skuadra dhe tifozët që tani shikojnë vendin e parë vetëm 4 pikë larg.
Në javën e 14-të Vllaznia do të përballet me Dinamon e cila është në një moment “JO” në kampionat, sfidë e cila do të luhet ditën e premte në orën 19:45.
Thomas Brdaric për këtë përballje ka grupin e plotë në dispozicion. Ajo që bie në sy nga grupi i shkodranëve është se trajneri ka 6 lojtarë në repartin e sulmit të cilët luftojnë për 3 fanella titullari.
Latifi, Ardit Hoxhaj dhe Aralica duket se janë të preferuarit e stafit teknik duke parë që kanë luajtur titullar në ndeshjet e fundit, por në garë për të luajtur nga minuta e parë janë edhe, Gjurgjevic, Çoba dhe Kaina që presin nga momenti në moment të zbresin në fushë.
Trajneri Bdraric ka zgjedhje luksi si pak skuadra të tjera në Superligë, dhe kjo mund t’i shkaktojë “dhimbje koke” për të mbajtur të ekuilibruar të gjithë, të cilët duan minutat e tyre në këtë kampionat.
