Pesë ambasadorë të akredituar në Tiranë, i SHBA, BE, Gjermanisë, Francës dhe Britanisë së Madhe, zhvilluan sot një takim me Lulzim Bashën, i cili u shkarkua nga posti i kreut të PD, nga Kuvendi i 11 dhjetorit, edhe pse ai nuk e njeh si vendim.
Anëtari i Këshillit Kombëtar të Partisë Demokratike, Arben Ristani, duke komentuar takimin e Bashës me diplomatët, tha se ambasadorët kanë vajtur në selinë blu me kërkesë të Bashës.
Më tej Ristani ka shtuar në “ABC Live” së Lulzim Basha nuk është më kryetar i demokratëve, pasi sipas tij pas referendumit më 18 dhjetor do të fillojë reformimi i partisë.
Ndërkohë Ristani ka deklaruar se demokratët që janë pozicionuar krah Sali Berishës do të shkojnë edhe sot në selinë e PD-së megjithëse nuk ka zbuluar agjendën e tyre.
“Ishte një vajtje normale e trupës diplomatike. Në mbledhjen tonë u shkarkua Basha. Dhe sot do shkojmë në seli, edhe nesër. Por presim të përgatitet mbledhja. Edhe në vijim do shkojmë. Vajtja jonë atje do jetë e përhershme. Në PD ka gjithmonë militantë, nuk ishin të thirrur dje. Ishte pakicë njerëz të rastësishëm,” tha Ristani.
