Lefter Koka i hyri politikës në vitin 2003, kur atëherë e përzgjodhi Fatos Nano, ish-Kryetar i PS dhe ish-Kryeministër, si kandidat të socialistëve për Bashkinë e Durrësit. Deri në atë kohë një emër i panjohur në rradhët e politikës, Koka kandidoi për kryebashkiak të Durrësit përballë Avni Hoxhës së PD. Në një garë shumë të kontestuar, Koka arriti të marrë mandatin e Kryebashkiakut, që e mbajti deri në 2007.
Pas largimit të Nanos nga kreu i PS-së dhe ardhjes së Edi Ramës në krye të kësaj partie, duket se përfundoi edhe kontrata e Kokës me socialistët, edhe pse ai vijoi si kryebashkiak i Durrësit.
Me përfundimin e mandatit, Koka nisi të ofrohej me LSI-në e drejtuar nga Ilir Meta, ndërsa Rama nxitoi ta zëvendësonte me Vangjush Dakon, i cili mori mandatin e Kryebashikaut të Durrësit. Lefter Koka në 2009 kandidoi për deputet pikërisht në Qarkun e Durrësit ku nën logon e LSI fitoi mandatin e deputetit, gjë që e ripërsëriti edhe në 2013-ën.
Me dy mandate deputeti dhe me suportin e LSI, ai u mandatua edhe si ministër i Mjedisit në qeverinë e parë të Edi Ramës.
Lefter Koka u rizgjodh deputet në vitin 2017 dhe nuk pranoi të hiqte dorë nga mandati i tij në vitin 2019 kur subjekti politik ku aderonte, LSI, dogji mandatet parlamentare si aksion politik.
Pas vitit 2019, Koka u bashkua me Partinë Socialiste dhe rikandioi për herë të katërt në qarkun e Durrësit.
Ai ishte deputeti i dytë më i votuar në këtë qark pas Edi Ramës duke marrë 9609 vota.
Menjëherë pas përfundimit të procesit zgjedhor, Koka dha dorëheqjen nga mandati nën argumentin se cikli i tij politik u mbyll. Gjithsesi dorëzimi i mandatit u përfol me një përfshirje të emrit të tij në listën e personave “non grata” edhe pse zyrtarisht emri i tij kurrë nuk u lakua nga Ambasada e SHBA apo DASH, duke mbetur thjesht një thashethem,
Në SPAK, Lefter Kokën e paditi forca politike ku militonte në fillim, Lëvizja Socialiste për Integrim, për lejet e dhëna për ndërtimin e impianteve për trajtimin e mbetjeve në Tiranë, Fier dhe Elbasan.
Sot Koka u arrestua me urdhër të SPAK pikërisht lidhur me inceneratorët, një aferë e denoncuar publikisht edhe nga shoqëria civile, edhe nga media edhe nga opozita në tërësi.
