Anëtarë të “komisionit të Rithemelimit të PD-së”, mes tyre edhe ish-kryeministri Sali Berisha kanë shkuar në selinë e Partisë Demokratike këtë të Hënë.
Në një prononcim të shkurtër për mediat para se të hynte në seli, Berisha tha: “Jemi këtu për të sjellë vullnetin e shumicës së demokratëve shqiptarë. Janë anëtarët e komisionit të përkohshëm të PD zgjedhur në kuvendin e fundit. Kanë ardhur të vendosen në selinë e demokratëve dhe të diskutojnë për problemet e anësishme të së ardhshmes. Tani ne po ngjitemi sipër”.
Më pas, ata u vendosën në një zyrë brenda partisë, ku pritet të zhvillohet mbledhja.
Brenda selisë, Berisha mbajti një tjetër prononcim, duke u shprehur se Basha kishte hequr karriget nga salla ku ata u vendosën: “I ka marrë të gjitha karriget, se nuk i mjafton karrigia e tij”.
Lidhur me padinë që “grupi Basha” depozitoi në SPAK, Berisha tha: “Deputeti Basha paditi në prokurorinë e tij dhe Edi Ramës deputetet e vet. S’ka akt më të padenjë”. “Në zyrën e Bashës nuk kemi punë. Sot vijmë këtu për të bërë një mbledhje. Deputeti Basha deri më datën 18 duhet të reflektojë për vendimin e Kuvendit më të jashtëzakonshëm në historinë e kombit”, shtoi.
Në një sallë tjetër të selisë qendrore në PD, Lulzim Basha po zhvillon po ashtu një mbledhje.
Në Kuvendin e 11 Dhjetorit, u vendos shkarkimi i Bashës nga drejtimi i PD-së dhe ngritja e një komisioni që sipas statutit të ri (miratuar po nga Kuvendi), do të drejtojë në mënyrë të përkohshme partinë deri në zgjedhjen e kryetarit të ri. Komisioni i ri ka 29 anëtarë.
