Ish-kryeministri Sali Berisha u shpreh se nëse zgjidhet kryetar i PD-së, nuk do të pranojë asnjë ambasador si guvernator.
I pyetur nga gazetarët se cilat do të jenë marrëdhëniet me ambasadën amerikane nëse zgjidhet kryetar i Partisë Demokratike, Berisha tha se ambasadori do respektohet maksimalisht, por asnjë ambasador s’do pranohet si guvernator.
“Në zgjidhem në krye të PD-së, orientimi properëndimor i Shqipërisë, pro NATO-s dhe BE do njohë një konsolidim të paparë, dëshmi për këtë është fakti se ka qenë qeveria e PD që ka anëtarësuar Shqipërinë në NATO…”, tha Berisha.
“Ky vend është bërë i pavarur me ndihmën e një presidenti amerikan. Kosova është bërë e pavarur me ndihmën e dy, për të mos thënë tre presidentëve amerikanë. Ata s’kanë mëndur dhe s’mendojnë kurrë që kush do hyjë në parlament e kush jo. S’kanë menduar kurrë që ambasadorja e tyre të thërrasë gazetarët dhe tu thojë kë të bojkotojë e kë jo. Ambasadori do jetë i respektuar si ambasador, por s’do pranohet si guvernator”, shtoi ai.
Berisha mbajti një konferencë për gazetarët pas mbledhjes së parë të “Komisionit të Rithemelimit”, organ i dalë nga Kuvendi i 11 Dhjetorit.
