Ish-kryeministri Sali Berisha deklaroi këtë të Hënë jashtë selisë së PD-së se Lulzim Basha “ka mbushur me banditë selinë e pd-së që kanë kërcënuar të rinjtë e FRPD-së”.
“E dënoj këtë qëndrim që dëshmon fytyrën e vërtetë të njeriut që për karrigen e tij ka marrë peng gjer para dy ditësh PD-në. E garantoj se do mbahet përgjegjësi për çdo akt dhune që do ushtrojnë banditët e tij këtu në Tiranë dhe mbarë Shqipërinë, u bëj thirrje të gjithë demokratëve të kësaj selie dhe kudo që janë të distancohen nga këto akte të turpshme që s’kanë ndodhur kurrë në selinë e PD-së”, tha Berisha.
Ashtu si Berisha që u takua me anëtarë të “Komisionit të Rithemelimit”, edhe Lulzim Basha zhvilloi një takim këtë të Hënë në ambientet e PD-së.
Zyra e shtypit njoftoi se: “Në PD po zhvillohet një takim për raportimin e Grupit të Punës për zgjedhjet në FRPD, me praninë edhe të Kryetarit të PD, Lulzim Basha”.
Ndërkohë, Kuvendi i 11 Dhjetorit rrëzoi vendimin e Bashës për zhvillimin e zgjedhjeve të reja në FRPD.
