Kuvendin më madhështor e ka cilësuar ish-Kryeministri Sali Berisha atë që po mbahet në stadiumin “Air Albania”. Berisha tha se ky është Kuvendi i pashembullt në histori, duke shtuar se ky Kuvend sjell Partinë Demokratike në themelet e saj politike.
“Në emrin tuaj përulem me mirënjohjen e pakufishme ndaj studentëve dhe studenteve liberatorë të Dhjetorit ´90 që u ngritën si luanë të vërtetë, dhe zhvilluan në rrugët e Tiranës një betejë, në njërën anë studentët dhe në anën tjetër diktatura”, tha Berisha.
Sipas ish-Kryeministrit, sot nga kjo platformë, duhet të përshëndes forcat konservatore, në Europë dhe në Botë.
“Kuvendi ynë është ngjarja historike për konservatorizmin, sepse ai mblidhet si Kuvend shpëtimtar, sepse ai mblidhet si Kuvend, i cili përballet me sukses, i vendosur të rrëzojë narkoshtetin në Shqipëri, por edhe të ngrejë PD si parti konservatore, duke u përballur me mafien më të egër në Botë, mafien e multimiliarderit George Soros.
Ne mblidhemi sot për të rithemeluar PD në një kohë kur megjithë trashëgiminë tonë të shkëlqyer, pa mohuar gabimet dhe defektet, ne erdhëm në vitin 21 të këtij shekulli, para një alternative shumë të rëndë: partia që anëtarsoi Shqipërinë në NATO, që dha kontribute historike në lirinë e Kosovës, partia që hodhi bazat e ekonomisë së tregut dhe projekteve të mëdha, partia, qeveria e së cilës ngriti shqiptarët nga grupi i kombeve më të varfëra, në grupin e kombeve me të ardhura të mesme”, tha Berisha.
Në vijim, ai tha se në 2021 arritëm në fazën që “të ishim si forcë politike, ose jo”.
“Por si ndodhi kjo? Në 2013 humbëm zgjedhjet, realizuam rotacionin e pushtetit, unë dhashë dorëheqjen si Kryetar, ashtu sikundër i takon çdo kryetari që kur humb zgjedhjet jep dorëheqjen. Në krye të saj erdhi përfaqësuesi i një gjenerate të re, i cili në vend që ta fuqizonte bëri të kundërtën e saj. Lulzim Basha u faktua si një kallp opozitar. Ai nisi drejtimin e partisë duke u përkulur në kundërshtim me ligjet, kushtetutën, fuqinë e pakufishme të forcës që drejtonte, para regjimit të Edi Ramës”, tha Berisha.
