Vjen reagimi i parë nga “PD institucionale” lidhur me Kuvendin Kombëtar që zhvillohet sot në “Air Albania”, thirrur nga delegatët me nismën e ish-kryeministrit Berisha.
Deputeti dhe sekretari i grupit parlamentar Arbi Agalliu shprehet se “Partia Demokratike ka lindur si parti e fjalës së lirë, si parti e të drejtave të njeriut, si parti e tregut të lirë e mbi të gjitha si parti pro Amerikane. Partia Demokratike lindi si mburojë e interesave të shqiptarëve do të vazhdojë e tillë e jo pronë e as mburojë e interesave personale të askujt, as të z.Sali Berisha”.
“Për këdo që u përball me gënjeshtra dhe manipulime të stilit komunist u them se në këtë ditë të shënuar të gjithë duhet të jemi të bashkuar, largë interesave personale, të tejkalojmë veten në të mirë të demokratëve dhe shqiptarëve”, shton ai, në një postim në rrjetet sociale, ndërsa poston dhe një fragment nga një intervistë televizive e zv/ndihmës sekretarit amerikan të Shtetit Escobar.
