Fatbardh Kadilli u shpreh se Partia Demokratike duhet të shkëputet nga e shkuara dhe nga udhëheqësit e së shkuarës, gjatë fjalës së mbajtur nga Kuvendi i PD-së në “Air Albania”.
Kadilli gjithashtu u shpreh se detyra e PD është të ndjekë një rrugë ndryshe nga ajo e kryeministrit Edi Rama, pasi sipas tij, Rama mundet vetëm me ndershmëri.
“Ndryshimi i partisë sonë është sfidë e vështirë. Jemi ne që ia lamë partinë Bashës që ta uzurponte për interesa personale. Ne na mungon kultura e lirisë dhe demokracisë , ndaj dalja nga gjendja nuk kërkon angazhim të madh. Vetëm nëse ne besojmë se askush nuk do të jetë mbi parimet atëherë ne vërtetë do të kemi demokraci. Partia Demokratike nuk ka nevojë për heronj, por për demokraci. Nëse jemi këtu për të zëvendësuar Bashën dhe Berishën kemi mashtruar veten dhe botën. Unë e di që në PD ka njerëz me vizion, mes anëtarëve ka njerëz me vizon. Ky duhet të jetë qëllimi të zgjedhim një udhëheqës që mendon si europian…jo si europian falso. Duhet të shohim në sy të metat dhe gabimet tona. Nevoja e PD sot është të bëjë një shkëputje të fortë nga e shkuara dhe udhëheqësit e së shkuarës. Detyra jonë nuk është të ndezim revolucion apo të rrëmbejmë armët, populli ka të drejtë të protestojë, PD ka detyrë të tregojë rrugë të ndryshme nga ajo e Edi Ramës”, deklaroi ai.
