Vllaznia do të përballet ditën e nesërme me Skëndërbeun në “Loro Boriçi”, ora 16:45. Një sfidë ku shkodranët kërkojnë 3 pikët për të vazhduar ecurinë e fitoreve dhe për të qenë pjesë e 3 skuadrave të para në tabelën e klasifikimit.
Në konferencën për shtyp, trajneri Thomas Brdaric ka folur për përballjen me korçarët dhe vështirësinë që ka kjo ndeshje, por 46-vjeçari ka edhe një përgjigje për deklaratën e trajnerit të Partizanit, Ilir Dajës ku ky i fundit theksoi se shkodranët po fshehnin topat që të vononin lojën.
Motivimi i skuadrës- “Ne jemi një ekip profesionist dhe është e nevojshme ta provojmë këtë sa herë që luajmë futboll. Ne duhet të vazhdojmë këtë trendin pozitiv të rezultateve dhe të përqendrohemi në gjërat thelbësore”.
Mungesat e Krymit dhe Gurishtës- “Mendoj se skuadra ka besim dhe e kam thënë disa herë se nuk kemi vetëm 11-lojtarë. Janë disa lojtarë që nesër do të kenë shansin të fillojnë nga fillimi, mezi e kanë pritur këtë mundësi. Tashmë, duhet të tregojnë se janë të aftë se e meritojnë të jenë pjesë e skuadrës”.
Skënderbeu nuk vlerësohet nga renditja? “Për mua Skënderbeu është një skuadër interesante, kanë lojtarë interesantë. Kanë zhvilluar ndeshje të mira dhe e dimë si të përballemi me këto skuadra. Nesër duam t’i mposhtim, nuk ka rëndësi si ata do të futen në fushë. Rëndësi ka ne të jemi të përqendruar dhe të shfaqim cilësitë tona në fushë”.
Kalendari i javës së 13-të, një mundësi e mirë që Vllaznia të afrohet me kreun? “Qëllimi jonë është të afrohemi me dy vendet e para, në të kaluarën e kemi humbur këtë mundësi. Por, nesër është një betejë tjetër, nuk do të nënvlerësojmë Skënderbeun. Çdo ndeshje ka rëndësinë e vet dhe ne do të kërkojmë fitoren me patjetër”.
Deklarata e trajnerit të Partizanit, Dajës për fshehjen e topave jashtë fushës? “E kuptoj që ka qenë i nervozuar pas ndeshjes, por ky është një justifikim i ulët. Nuk dua t’i përgjigjem, duhet të jetë i fokusuar te ekipi i tij, edhe unë jam i përqendruar te ekipi im”, ka deklaruar tekniku i shkodranëve.
