Një 59-vjeça është arrestuar nga policia e Tiranës, pasi akuzohet se mashtronte vajza të mitura, me qëllim përfitimin seksual.
Në kuadër të operacionit policor të koduar “Predator”, ra në pranga M. Ç., 59 vjeç, i dënuar më parë për veprën penale “Ngacmimi seksual”. Ai akuzohet për veprat penale “Ngacmimi seksual” dhe “Trafikimi i të miturve”.
Nga hetimet ka rezultuar se ky shtetas i joshte vajzat, kryesisht nën moshën 18-vjeçare, nëpërmjet telefonit dhe rrjeteve sociale.
“Nga hetimet ka rezultuar se ky shtetas, nëpërmjet telefonit dhe rrjeteve sociale, mashtronte femra, kryesisht të mitura, për përfitim seksual. Në kuadër të këtyre hetimeve është bërë i mundur identifikimi në kohë i personit të dyshuar dhe parandalimi i kryerjes së veprimeve të mëtejshme kriminale nga ky shtetas, me të miturat. Ky shtetas u kap në kushtet e flagrancës, pasi kishte organizuar një takim me një shtetase tjetër të mitur. Gjatë veprimeve hetimore (këqyrjes së celularit) janë gjetur prova kompromentuese për këtë shtetas, që e implikojnë në këtë veprimtari kriminale”, njoftoi Policia.
