Kryetarja e Lidhjes Demokratike të Gruas në Dibër, Dafina Muda, denocon falsifikimin e firmës së saj lidhur me mbështetjen për Kuvendin e 18 dhjetorit, i thirrur nga Kryesia e PD, pas propozimit të kreut demokrat Lulzim Basha.
Muda tha për Syri Tv se dikush ka firmosur në emër të saj.
“Kanë firmosur për mua pa dijeninë time për Kuvendin e dt.18 Dhjetor. Kërkoj të bëhet publik formulari që pretendojnë që është firmosur nga unë”, u shpreh delegatja Dafina Muda.
Më herët u denoncua falsifikimi edhe nga delegatët Spiro Vaso, Xhulian Guçe dhe Mimoza Rexhvelaj.
Ata deklaruan se kanë firmosur për Kuvendin e datës 11 dhjetor dhe do të jenë nesër të pranishëm në stadiumin Air Albania, atje ku do të mbahet Kuvendi i thirrur nga delegatët që mbështesin ish-Kryeministrin Sali Berisha.
