Katër persona janë arrestuar nga policia e Elbasanit në kuadër të aksionit anti-drogë të koduar “DRAGOT 2021”.
Policia ka sekuestruar 48 kg lëndë narkotike e dyshuar kanabis sativa, 2 automjete, 3 aparate celulare dhe 1 thikë.
Sipas bluve, katër personat e vënë në pranga ishin duke transportuar lëndën narkotike, me qëllim shitjen e saj.
Aksioni
S.M., 25 vjeç, M.H., 22 vjeç, F.Y., 25 vjeç, banues në Vlorë dhe P.B., 22 vjeç, banues në fshatin Pilur, Himarë, janë personat e arrestuar. Ndaj tyre rëndojnë akuzat për veprat penale “Prodhimi dhe shitja e narkotikëve”, kryer në bashkëpunim dhe “Prodhimi, mbajtja, blerja apo shitja pa leje e armëve të ftohta”.
Sipas policisë: Bazuar në informacionet e marra në rrugë operative, gjatë operacionit, në rrugën që lidh Lushnjën me Belshin, në Dragot, bënë lokalizimin dhe bllokimin e automjeteve me të cilat dyshohej se transportohej lënda narkotike. Nga kontrolli fizik i personave të arrestuar dhe mjeteve tip ”Audi A6” dhe “Volkswagen” u gjet lëndë narkotike e dyshuar cannabis sativa, me peshë 48 kilogramë, 1 thikë dhe 3 aparate celulare.
Në cilësinë e provës materiale u sekuestrua lënda narkotike, 3 aparate celulare, 1 armë e ftohtë (thikë) dhe 2 automjetet.
Në bashkëpunim me Prokurorinë vijon puna për identifikimin dhe kapjen e personave të tjerë të implikuar në këtë veprimtari kriminale, njoftoi policia.
