Punimet për bazën ajrore të NATO-s në Kuçovë do të nisin në fillim të vitit të ardhshëm.
Ministri i Mbrojtjes, Niko Peleshi, njoftoi sot pas mbledhjes së qeverisë se guri i parë do të vendoset në ditët e para të janarit, ndërsa garantoi banorët e prekur nga projekti se do të shpronësohen në vlerën e tregut.
“Me vendimin e sotëm kompletojmë kuadrin rregullator, ligjor dhe i hapim rrugën fillimit të punimeve. Në ditët e para të janarit do të vendoset në mënyrë simbolike guri i parë i bazës taktike të Kuçovës, bazë taktike e NATO-s. Lajm i mirë dhe për familjet që preken nga vendimi i sotëm, i shpronësimit, do shpronësohen sipas vlerës së plotë të tregut pa asnjë vonesë. Për banorët e zonës përreth është një lajm i dyfishtë pozitiv pasi është një zhvillim mbi 50 mln euro investim, që do të thotë zhvillim ekonomik dhe punësim për gjithë zonën përreth”, tha ai.
“Do të kemi një bazë taktike të NATO-s që do të thotë më shumë siguri për sot dhe nesër. Le të presim dhe pak javë derisa të fillojmë punën pasi të mbyllim gjithë shpronësimet bazuar te ky vendim i Këshillit të Ministrave”, shtoi.
