Ish-deputeti demokrat Mark Marku është shfaqur këtë të Mërkurë në aktivitetin e organizuar nga Partia Demokratike me rastin e ditës së Rinisë.
Akademiku pritet të mbajë një fjalim në aktivitetin ku i pranishëm është dhe kryetari i PD-së Lulzim Basha.
Mark Marku u caktua drejtuesi politik i Qarkut Lezhë për zgjedhjet e fundit parlamentare. Nga 25 Prilli, PD doli e humbur dhe Mark Marku ishte një ndër zërat kritikë më të fortë brenda partisë ndaj kryetarit të demokratëve.
Akuzat e para publike ndaj Bashs i bëri në Kuvendin e PD-së, që u zhvillua pas humbjes në zgjedhje. Më tej, Marku njoftoi lënien e mandatit. “Etapat e njëpasnjëshme të rënies së vazhdueshme te PD-së në një rutinë humbëse dhe se Basha është thjesht ‘kryetar i partisë së Berishës’, PD po shndërrohet në një parti që mbron interesat personale të dy liderëve të vet, Berishës dhe Bashës dhe të një grupi të ngushtë drejtuesish të PD-së duke tradhtuar interesat e atyre që e kanë mbështetur me aq mund, përkushtim e sakrifica”, shkruante ndër të tjera Marku, në një artikull ku shpjegonte arsyet e dorëheqjes.
Këtë të Mërkurë, është shfaqur në aktivitetin e organizuar nga PD duke lënë të kuptohet se ai dhe Basha kanë arritur një formë paqeje.
