Vllaznia do të luajë nesër supersfidën e javës së 12-të të Superligës ndaj Partizanit. Takimi do të zhvillohet në “Loro Boriçi” në Shkodër e do të nisë në orën 16:45. Ditën e sotme në konferencën për shtyp në krah të trajnerit Brdaric ishte dhe Esin Hakaj. Për mbrojtësin e majtë kjo është një ndeshje speciale pasi për 3 vite ka qenë pjesë e Partizanit, ndërsa tani kërkon që t’i mposht me Vllazninë.
“Fitorja do të ishte një dhuratë e bukur për mua me rastin e ditëlindjes. 3 pikëshi na vlen shumë për ecurinë e kampionatit”.
Sezoni më e mirë? “Ka patur ndeshje të mira, shpresoj të kem akoma më shumë rritje dhe të ndihmoj skuadrën, do të shikojmë”.
Sfida ndaj ish skuadrës? “Kam kaluar 3 vite, ka patur momente që nuk kam qenë lojtari formacioni, por 3 vite janë shumë dhe kam pak emocione. Tani jam në qytetin tim dhe dua të fitoj diçka me këtë skuadër”.
Sa shanse ka Vllaznia të fitojë nesër? “Normalisht që jemi favorit për të fituar. Vllaznia ka një skuadër shumë të mirë edhe pse kemi lënë disa pikë rrugës. Besoj se skuadra është rritur dhe do të ecim më përpara”.
Vllaznia në fund të vitit? “Nuk i dihet pasi në futboll duhet edhe fat, por jemi një nga skuadrat pretendente kryesor për titull”.
Diferenca me Tiranën? “Nuk na frikëson pasi ka kohë dhe ndeshje shumë. Çdo skuadër ka oshilacionet e veta e do të shikojmë”.
Tifozët? “Besoj se do të jenë të shumtë nesër dhe ishalla dalim me fitore”, u shpreh Hakaj.
