Kryetari i Partisë Demokratike, Lulzim Basha, u shpreh sot se zgjidhja e vetme për të nxjerrë vendin nga kolapsi janë zgjedhjet e lira dhe të ndershme.
Në një intervistë për News 24, Basha tha se më 25 prill ishte një masakër elektorale që s’kishte lidhje me zgjedhjet dhe thelloi krizën politike, sociale dhe ekonomike në vend.
“I bëj thirrje demokratëve që të mos pranojnë të keqpërdoren për interesat personale të askujt, përfshi këtu edhe interesat personale të z. Sali Berisha. Beteja jonë është me Edi Ramën, ndaj të bashkohemi në Kuvendin e PD më 18 dhjetor”, tha Basha.
Ai u shpreh se vendimin e 9 shtatorit për të përjashtuar Sali Berishën nga Grupi Parlamentar do e merrte sërisht.
“Ishte një vendim që erdhi pas 3 muaj negociatash dhe përpjekjesh për të gjetur një zgjidhje dhe nuk duhet të harrojmë se ne kishim vendosur një standard lidhur me personat që shpalleshin “non grata”. Edhe sikur të isha unë i godituri nga vendimi i SHBA, duhet të prevalojnë interesat e PD dhe jo të individëve”, tha Basha.
Ai tha se duke parë ndryshimet në deklaratat dhe gjuhën e përdorur nga z.Berisha para dhe pas 9 shtatorit, më vjen keq ta them, por unë se paskam njohur ish-Kryeministrin.
“Gjuha, metodat e veprimit, trillimet, gënjeshtrat, zhbërja e të vërtetave apo kthimi i tyre kokëposhtë, më ka lënë një shije shumë të keqe”, tha Basha. Ai tha se ishte paralajmëruar nga Berisha më parë për rrugën që ai do të ndiqte, ndërsa shtoi se ndjente keqardhje, për investimet që ai kishte bërë, familja e tij dhe demokratëve të lagjes ku është rritur.
“Besoja se Berisha do i hapte rrugë PD dhe nuk do e përdorte atë si një mburojë për të mbrojtur veten nga vendimi i SHBA”, tha Basha.
