I pranishëm në një konferencë për shtyp këtë të premte, Xavi foli për të ardhmen e Frenkie de Jong, i përfolur për largimin nga katalanasit javët e fundit, por për trajnerin e ri të blaugranëve, thashethemet mbeten të tilla.
Jo gjithmonë bindës, me fanellën e Barcelonës që nga fillimi i sezonit, holandezi u përfol se do të transferohej tek Manchester City në merkaton dimërore, por tekniku i klubit katalanas e ka mohuar këtë dhe ka thënë se De Jong është i patransferueshëm.
“Ai është i patransferueshëm”, u tha Xavi gazetarëve përpara se të thoshte më shumë për mesfushorin holandez, me kontratë deri në vitin 2026 me blaugranët: “Frenkie është shumë i rëndësishëm. Ai është në gjendje të bëjë diferencën, të shënojë. Luajti shkëlqyeshëm kundër Villarrealit (3-1). Ne pamë Frenkie që duam të kemi.” Mesazhi është shumë i qartë dhe tifozët e Barcelonës mund të marrin frymë. Me përjashtim të një kthese të papritur, Frenkie de Jong nuk do të ndryshojë klubin këtë dimër apo verën e ardhshme.
