Një “shtëpi bari” e ndërtuar në bodrumin e një banese në fshatin Jeran të Shkodrës është zbuluar nga policia, që ka arrestuar një 42-vjeçare dhe ka shpallur në kërkim bashkëshortin e saj.
Gjatë operacionit, është zbuluar ambienti i përshtatur për kultivim të kanabisit, me anë të llambave, në një banesë ku kishte lidhje të paligjshme elektrike. Po ashtu, janë sekuestruar 139 kg kanabis, fidanë narkotikë të kultivuar në vazo, 63 llamba elektrike dhe baza të tjera materiale që shërbenin për kultivimin e kanabisit nëpërmjet llambave elektrike.
Aksioni
Burime zyrtare bënë me dije se strukturat hetimore të Drejtorisë Vendore të Policisë Shkodër, në bashkëpunim me Forcat Operacionale dhe “Shqiponjat” e DVP Shkodër, bazuar në informacionet e marra në rrugë operative se një shtetas kishte përshtatur në bodrumin e banesës së tij, një ambient për kultivimin në kushte laboratorike të bimëve narkotike kanabis sativa, organizuan dhe finalizuan operacionin policor të koduar “Jeran”, në kuadër të të cilit u arrestua në flagrancë shtetasja Mariana Vuksanaj, 42 vjeçe, si dhe u shpall në kërkim bashkëshorti i saj, Gjovalin Vuksanaj, 55 vjeç.
Policia njofton se sekuestruar 139 kg lëndë bimore e dyshuar kanabis sativa, 132 fidanë të dyshuar narkotikë të kultivuar në vazo, 63 llamba elektrike, baza të tjera materiale që shërbenin për kultivimin e kanabisit nëpërmjet llambave elektrike dhe 1 automjet.
Gjithashtu, gjatë operacionit, në këtë banesë është konstatuar lidhje e paligjshme e energjisë elektrike.
Akuzat që janë ngritur ndaj çiftit të bashkëshortëve janë për veprat penale “Prodhimi dhe shitja e narkotikëve” kryer në bashkëpunim, “Kultivimi i bimëve narkotike” kryer në bashkëpunim dhe “Vjedhja e energjisë elektrike.
