Një 66-vjeçar është arrestuar nga policia e Lezhës për veprat penale “Mbajtja pa leje e armëve të zjarrit, armëve shpërthyese dhe municionit luftarak” dhe “Prodhimi dhe shitja e narkotikëve”.
Burime zyrtare nga policia konfirmuan këtë të Premte se gjatë kontrollit në dy banesat e të arrestuarit u gjetën kanabis, fishekë, lëndë eksplozive, granata difensive dhe një armë zjarri.
Aksioni për arrestimin e Shefki Brunga, 66 vjeç, banues në lagjen “Nënë Tereza”-Lezhë, erdhi pas informacioneve në rrugë operative, shtuan të njëjtat burime.
“Gjatë kontrollit të ushtruar në banesën e tij, shërbimet e Policisë gjetën dhe sekuestruan në cilësinë e provës materiale: 6 kilogramë e 300 gramë lëndë narkotike kanabis, 930 fishekë, 6 kallëpe lëndë eksplozive C-4, 7 granata difensive, 22 ndezës për granata, 99 kapsolla detonatore, pajisje metalkërkuese, kundërgaz ushtarak, 3 krehra dhe 3 aparate celulare. Gjithashtu, gjatë kontrollit të ushtruar nga Policia e Dibrës, në banesën tjetër të këtij shtetasi, në Lurë, është gjetur një armë zjarri pushkë gjysmëautomatike”, njoftoi policia.
