Kreu demokrat, Lulzim Basha, nga foltorja e Kuvendit, u shpreh se kjo qeveri nuk mund të ndalojë pastrimin e parave. Basha, gjatë diskutimit të projektligjit për pastrimin e parave, tha se krimi i organizuar ka sekserët e tij në kabinetin qeveritar.
“A mundet që këta që dalin në përgjimet e anti-mafies italiane të garantojnë ndalimin e pastrimit të parave? Këto dolën dy javë më parë në përgjimet e Ndraghetas, Cosa Nostras, për pastrimin e parave në Shqipëri, madje përmendeshin edhe zv.Kryeministri apo Drejtori i Drejtorisë së Parandalimit të Pastrimit të Parave.
A mund që këta që kanabizuan vendin të parandalojnë pastrimin e parave?
Është e pafalshme që të kërkosh për gjurmë, pasi e keni në këtë sallë dhe pak metra që këtu ujkun. Mjafton të shikoni se si po ngrihen kat mbi kat ndërtimet dhe lavatricet e pastrimit të parave qarkullojnë 24 orë në 24 për 365 ditë të vitit”, tha Basha.
Kreu demokrat tha se këto nuk janë evidentime të opozitës, por të organizatave ndërkombëtare, që e cilësojnë Shqipërinë, si një vend të pambrojtur të pastrimit të parave për shkak të korrupsionit.
Duke cituar disa raporte, Basha tha se miliardat po pastrohen duke i kthyer në beton dhe gradacela, që po zenë edhe diellin.
Basha tha se kullat në Tiranë janë kthyerv në lavatricen e pastrimit të parave të drogës dhe parave të pista, që po i nxjerrin nga dyshekët dhe po i kthejnë në beton.
Kreu demokrat tha se askush nuk po heton faktin se tenderat dhe lejet e ndërtimit po u jepen kompanive fantazëm. Basha tha se e gjitha kjo po prodhon një ekonomi të droguar, jo reale, pa punë e mirëqënie për qytetarët.
“Drejtësia të mos fshihet pas gishtit, ndiqni paratë zotërinj të SPAK, dilni nga makinat tuaja të blinduara, ngrini kokën lart, dhe shtrojini vetes një pyetje: si mbijnë këto kulla në Tiranë”, tha Basha. Sipas tij, bazuar në raportet ndërkombëtare, në 3 vjet janë pastruar 1.6 mld dollarë.
“Pranoni për veten tuaj atë që kërkoni të bëni të detyrueshëm për noterët, vettingun për veten tuaj”, tha Basha, duke shtuar se kjo është rrugëzgjidhja e vetme për të pastruar politikën nga krimi dhe të korruptuarit.
