“Momenti ka mbërritur. Bashkimi Europian duhet të diskutojë mundësinë e vaksinimit të detyrueshëm, për të luftuar valën aktuale të infektimeve me Covid-19 e gjithashtu variantin e ri Omicron”. Kështu u shpreh presidentja e Komisionit Europian Ursula Von Der Leyen, e cila tha se dy ose tre vite më parë, nuk do ta kishte menduar kurrë, një diskutim të tillë.
“Mendoj se është e kuptueshme dhe e përshtatshme të zhvillojmë një diskutim të tillë tani. Si të inkurajojmë dhe mundësisht të mendojmë për vaksinimin e detyrueshëm brenda Bashkimit Europian. Kjo çështje ka nevojë për diskutim, dhe duhet një qasje e përbashkët”, tha presidentja e KE.
Von der Leyen tha se do të duhe t2-3 javë kohë për të kuptuar më shumë mbi variantin e ri.
“Të shpresojmë për më të mirën, por të përgatitemi për më të keqen”, tha ajo, duke u bërë u thirrje qytetarëve të vaksinohen, e të marrin dozat përforcuese.
Më herët, edhe Gjermania, vendi me qasjen me të kujdesshme ndaj kufizimit të lirive foli për vaksinën të detyrueshme. Olaf Sholc, i cili pritet të zëvendësojë Angela Merkel në postin e kancelarit, tha se do të mbështesë një propozim për të bërë të detyrueshëm vaksinimin për të gjithë, duke filluar nga viti i ardhshëm.
Megjithatë sipas tij, ligjvënësit duhet të ndihen të lirë të votojnë sipas bindjes së tyre lidhur me çështjen:
“Do t’i hapim rrugën një vendimi që do të mbështetet në ndërgjegjen e anëtarëve të Bundestagut gjerman, lidhur me një mandat të përgjithshëm vaksinimi qe do të hyjë në fuqi vitin e ardhshëm, në muajin shkurt ose fillim të marsit. Unë do të votoj në favor të një ligji të tillë”.
Gjermania regjistroi 446 vdekje në 24 orët e fundit, numri më i lartë që prej shkurtit. Autoritetet shëndetësore ngrënë alarmin për tejmbushjen e terapive intensive para Krishtlindjeve.
