Edhe pse viti nuk është mbyllur ende, shifrat e të miturve që janë përfshirë në veprimtari kriminale janë më të larta se vitin që lamë pas.
Fakti u raportua këtë të Mërkurë nga Drejtori i Policisë së Shtetit Gledis Nano, në një seancë dëgjimore lidhur me gjendjen e kriminalitetit në vend dhe masat e marra për parandalimin e tij.
Nano u shpreh se “shqetësues vazhdon të mbetet përfshirja e të miturve në veprimtari kriminale”.
“Janë evidentuar gjithsej 1604 të mitur të dyshuar si autorë veprave penale nga 1358 që ishin vitin e kaluar. Numri më i lartë i të miturve të dyshuar si autorë, paraqitet në tendenca kriminale me rrezikshmëri të ulët shoqërore si vjedhja – 40 përqind, shkelja e rregullave te qarkullimit – me 90.4 përqind, ndërsa për vepra penale me rrezikshmëri të lartë shoqërore numri i të miturve të dyshuar autorë është relativisht i ulët”, informoi ai.
“Duke krahasuar kriminalitetin në radhën e të miturve dhe ndaj tyre në radhë të parë si një problem të rëndësishëm social, strukturat përgjegjësi të policisë janë angazhuar në projekte të ndryshme për mbështetjen e tyre, për edukim dhe integrim…”, shtoi Nano.
