Ish-Sekretari i Përgjithshëm i PD, Arben Ristani, ka zbuluar procedurat që do të ndiqen për zgjedhjet e reja në Partinë Demokratike, që sipas tij do të bëhen përmes parimit një anëtar një votë.
Ristani ka thënë se në Kuvendin e datës 11 Dhjetor do të diskutohen vendimet antistatutore të Bashës, dhe do të futen dispozita në statut që të lejojnë referendumet e brendshme.
Ristani është shprehur se do ti bënte nder pakicës që drejtohet nga Basha, që ti bashkohej Kuvendit të thirrur nga Berisha në datën 11 Dhjetor, që sipas tij i përket shumicës.
“Tashmë është e sigurt që në datën 11 kuvendi i PD i thirrur nga mbi 1/4 e anëtarëve do të mblidhet për të ndryshuar statutin e PD, për të shqyrtuar veprimtarinë antistatutore të kryetarit të PD dhe për të rifutur në statutin e PD dispozita të cilat do të bëjnë të mundur mbajtjen e referendumeve në PD.
Janë dorëzuar para disa kohësh siç jeni në dijeni, mbi 4200 firma të anëtarëve të kuvendit të PD, firmat janë në masë të mbledhura nga anëtarët e kuvendit, sigurisht me vullnetin e plotë të tyre. Janë dorëzuar në zyrat e këshillit kombëtar të PD, kanë qenë të hapur për median e për çdo të interesuar për tu verifikuar.
Nga ana tjetër keni deklarime të përditshme të anëtarëve të kuvendit nga degë të ndryshme të PD, shembuj të deputetëve të cilët kanë shkuar për ti verifikuar këto firma kështu që është jashtë çdo dyshimi që firmat janë me vullnet të plotë. PD vepron në kushte të sovranitetit të saj, është vullneti i anëtarëve jo vetëm të kuvendit por të të gjithë PD, për të zgjedhur atë që ata mendojnë se e drejtojnë drejt fitores dhe prosperitetit”, tha Ristani.
Ai shprehet se ky kuvend nuk do ta mbyllë këtë proces por do ta hapë atë.
“Pas kuvendit do të ketë zgjedhje në të gjitha degët e PD, dhe zgjedhje të kryetarit të PD me sistemin një anëtar një votë. Thashë kjo mbetet në vullnetin e anëtarëve të PD.
Ndërkohë zoti Berisha është tërësisht i lirë në vullnetin e tij, për të ofruar punën e tij dhe mundësitë e tij për PD. Për mendimin tim kuvendi i vetëm është ai i vullnetit të anëtarësisë të PD i cili do të mblidhet në datën 11. Kini parasysh demokracia është vullneti i shumicës dhe shumica do të mblidhet në datë 11.
Kini parasysh se do të shohim se si shumica e anëtarëve të Kuvendit të PD në dt 11 do të mblidhen, nuk mund të ketë një kuvend tjetër sepse nuk mund të krijohet një shumicë tjetër për datën 18. Nuk do të ketë në 18 një kuvend, të paktën jo një kuvend shumice”, shtoi Ristani.
Ai vijoi duke u shprehur se është në detyrën e pakicës të vijnë sepse organet drejtuese të PD edhe për aq sa në gjithë procesin e parregullt në të cilën janë zgjedhur sekretariatet, por përsëri e kanë për detyrë të vijnë.
“Që në fillim të kësaj lëvizje kurrë nuk e kemi patur një problematikë midis Berishës dhe Bashës. Është një problematikë dhe një konflikt midis anëtarëve të PD dhe kryetarit i cili shkel statutin në mënyrë të vazhdueshme. Konflikti nuk është midis Bashës dhe Berishës dhe nuk mund të zgjidhet midis tyre, ai është mes anëtarëve të PD dhe kryetarit Basha. Kryetari i cili e përsëris edhe një herë e ka çuar partinë nga një humbje në një tjetër”, tha Ristani.
