Një debat është zhvilluar mes deputetit Ervin Salianji dhe kreut të Komisionit parlamentar të Sigurisë Kombëtare, Nasip Naço, lidhur me fotot dhe mesazhet që deputeti socialist Bujar Çela provokoi shqiptarët më 28 nëntor, duke u shfaqur si një nostalgjik i diktatorit Enver Hoxha.
Salianji ka kërkuar distancimin e Naços, por edhe anëtarëve socialistë të Komisionit të Sigurisë, nga mesazhet e Çelës, duke u shprehur se ai nuk ka fyer vetëm deputetët me mesazhet e tij, por para së gjithash ka fyer ata që u burgosën, internuan dhe u vranë nga regjimi diktatorial.
“Distancohuni, dënoni veprimet e këtij deputeti, ne s´mund të bëjmë sikur nuk ka ndodhur gjë”, tha Salianji.
Ndërkohë Nasip Naço tha se Bujar Çela është deputet zëvendësues në Komisionin e Sigurisë.
“Jam munduar të fshij komentet dhe mesazhet e tij, nuk arrita ta bëj dot, atëherë e nxora jashtë grupit të whats app. Tashmë do të jetë Komisioni i Etikës që do e shqyrtojë rastin, ne duhet ta dëgjojmë edhe atë dhe pastaj të marrim një vendim”, tha Naço.
