Një organizatë kriminale që trafikonte drogë midis Siçilisë, Kalabrisë dhe Maltës u çmontua nga Guardia di Finanza e Katanias.
Sipas mediave ndërkombëtare në këtë operacion u arrestuan 16 persona dhe u sekuestruan 423 kg drogë.
Operacioni i koduar “La Vallette”, u ndoq nga mbi 100 financierë të Komandës Provinciale, me mbështetjen e kolegëve nga Raguza dhe Scico, midis Siçilisë dhe Kalabrisë, dhe veçanërisht në katër provinca (Catania, Raguza, Syracuse dhe Reggio Calabria).
Organizata akuzohet për trafikun ndërkombëtar të drogës.
Sipas raportimeve, nga hetimet u zbuluan veprimtari kriminale të ndërmarra nga Raguza, Shqipëria dhe Malta. Ata dyshohet të jenë përgjegjës për trafikim të kokainës, hashashit dhe marijuanës të blera nga Shqipëria, Pulia dhe Kalabria dhe të rishitur në Siçili, Lombardi dhe Maltë.
Paraburgim përpara gjyqit është caktuar për Alessandro Agostino; Giuseppe Agostino; Salvatore Agostino; Rosario Amico; Lucia Armenia; Antonio Bevilacqua; Rocco Bevilacqua; Antonio Salvatore Commisso; Fatjon Cuca; Emiljano Hoxhaji; Eriseld Hoxhaji; Zonja Hoxhaji; Roberto Melfi; Pietro Sessa; Gjon Spiteri.
Sipas raportimeve, shqiptarët Eriseld Hoxhaj dhe Emiljano Hoxhaj akuzohen si furnizues të marijuanës që e merrnin në Shqipëri dhe ia shisnin Amico-s, i cili së bashku me bashkëpunëtorët e tij të tjerë do t´a rishisnin te John Spiteri, që vepronte në Maltë.
Kalabrezët Alessandro dhe Giuseppe Agostino me Antonio Bevilacqua dyshohen si furnizues të qëndrueshëm – në disa rrethana të ndihmuar edhe nga Salvatore Agostino dhe Rocco Bevilacqua – të kokainës, marihuanës dhe hashashit, që do të transportoheshin nga Kalabria dhe do të shiteshin në sasi të mëdha nga Amico.
Roberto Melfi akuzohet si blerës i kokainës, të cilën dyshohet se e ka rishitur në provincat e Milanos dhe Monzës.
