Për hetimin e vdekjes së 4 turistëve rusë në një hotel në Qerret të Kavajës janë përfshirë edhe agjensitë e inteligjencës shqiptare, që duket se do të ndihmojnë Prokurorinë për të zbardhur ngjarjen që ka mbetur mister prej disa javësh.
Nga raportimet mësohet se Agjencia e Inteligjencës dhe Sigurisë së Mbrojtjes është një nga strukturat që do të ndihmojë hetimet, ndërsa laboratori dhe pajisjet që zotërohen nga ushtria mund të hedhin më shumë dritë nëse në vdekjen e 4 turistëve rusë janë përdorur ose jo agjentë biologjikë.
Sergei Burenkov, një prej viktimave, ka qenë kolonel në Moskë dhe duket që kjo është arsyeja që në hetime është përfshirë edhe Agjencia e Inteligjencës, Sigurisë dhe Mbrojtjes.
Bashkëshortët Natali Burenkova dhe Sergei Burenkov, 58 dhe 60 vjeç, vajza e tyre Ekaterina, 31 vjeçe dhe i fejuari i saj, Nikita Belousov, 37 vjeç, gjetën vdekjen brenda pak minutash dhe nga i njëjti shkak vetëm pak orë pasi ishin akomoduar në hotelin luksoz në Qerret të Kavajës. Ngjarja ndodhi në mesin e muajit tetor, ndërsa viktimat më parë kishin qenë në Maqedoninë e Veriut si turistë.
Prokuroria e Kavajës e ka regjistruar ngjarjen si “vrasje, në rrethana të tjera cilësuese”, por ende nuk ka një autor për të.
Fillimisht u hodhën hipotezat se viktimat mund të kishin qëndruar më shumë në sauna dhe mund të ishin asfiksuar. Pastaj u hodh teza se ata mund të kishin pësuar vdekjen nga sasia e lartë e klorit, që ishte përdorur për dezifektimin e pishinës, ndërsa analizat e ISHP nuk dhanë rezultate.
