Deputeti i PD-së, Luan Baçi ka folur lidhur me situatën aktuale brenda demokratëve dhe incidentin e ndodhur në Fier ku u ndërruan bravat e zyrave lokale të partisë.
Në një prononcim për Fax News, Baçi tha ndër të tjera se “de facto” ai vijon të jetë kryetar i PD në degën e Fierit dhe shtoi se Bashën e konsideron si ish-kryetar. Për të, tha se nuk e meritoi rizgjedhjen në postin e kreut të PD-së. Ai kujtoi edhe se gjatë zgjedhjeve që u bënë për kryetar partie gjatë Qershorit, Lulzim Basha kishte shkuar në mënyrë të përulur për të kërkuar mbështetjen e anëtarësisë së PD në Fier, ndërsa shton se tani ndërron bravat vjedhurazi.
“Degën e Fierit vazhdoj ta drejtoj unë de facto për vetë faktin se po ë shihni takimet e mia janë të përditshme me kryetarët e grup-seksionesh. Ne jemi një ekip i perfeksionuar tashmë prej 8 vitesh që e ka nderuar opozitën duke marrë pjesë në protesta dhe në organizime të ndryshme, në bllokimin e bërë ndaj kryeministrit pas djegies së mandateve. Pavarësisht nga veprimi i turpshëm i bërë nga lidershipi i PD duke hyrë si hajdutë në zyrat e PD dhe duke i mbajtur ato thjesht si godina. Kam parasysh një prej komentuesve që thoshte: Kosheren le ta mbajnë se bletët janë gjetkë. Në fakt demokratet janë njerëzit që vijojnë të përballen me Ramën. Pra individë që nuk kanë mbështetjen e bazës nuk mund të quhen se drejtojnë PD-në në Fier. Kemi 15 kryetarë grup-seksionesh dhe 15 sekretarë të grup seksioneve që janë të aftë në punën që bëjnë. Duke qenë një situatë e tillë nuk ishte e nevojshme një veprim i tillë nga kryetari në detyrë apo ish kryetari Lulzim Basha”, tha Baçi.
“Para se të fillonte foltorja e PD, kryetari nëse mund ta quajmë ashtu Basha më kërkoi një tubim madhështor në Fier dhe ashtu e pati pavarësisht pakënaqësisë që patëm ndaj tij për listat e para 25 Prillit. Gjithsesi ishte në hallin e vetë për t’u rigjedhur dhe sjellja e tij ishte e përulur vetëm për të kaluar hallin dhe për t’u rizgjedhur në mënyrë të pamerituar. Por pasi pa se pas foltores Berisha mbështetej masivisht nga anëtarët e PD nuk i pëlqeu dhe u hakmorr në këtë mënyrë me PD-në e Fierit duke uzurpuar zyrat. Duke qenë se ishin jo të mirëpritur ndërruan bravën duke hyrë vjedhurazi. Të gjithë votuesit tanë ishin përgatitur për të ardhur në pushtet. Jam dakord se ishte një masakër elektorale por në fund fare unë doja të thoja se sado i madh të jetë presioni opozita duhet të vazhdonte dhe të mbante përgjegjësi edhe për faktin se zgjedhjet i vodhëm. Do ndodhë sërish që në zgjedhjet e ardhshme t’i vjedhin sërish dhe ne të jemi sërish në opozitë. Jo, beteja ka mbaruar pas 2021, pas 25 prillit dhe kemi humbur katër herë”, shtoi ai.
